عن التجربة
هل بقدر الجيران يحلوا مشاكلهم بحالهم إذا انعطوا أدوار واضحة وهيكل تنظيمي بسيط؟
هاد السؤال اللي طلعنا نجاوب عليه. بنشتغل مع مجموعة من شباب وبنات الحارة، بنحدد مشاكل حقيقية، وبنجرب نحلها سوا — خطوة خطوة. وبننشر كل اشي بنتعلمه: شو زبط، شو ما زبط، وليش..
شو عم نختبر؟
احنا منعتقد انه المواطنين بنابلس حابين يعيشوا بحارات وأحياء أفضل، وما عندهم مانع يتعاونوا. اللي ناقص مش الرغبة — اللي ناقص هيكلية بسيطة بتخلي التعاون يبدأ، ويتكرر، ويستمر.
عشان هيك بنختبر إذا إعطاء الحارة هيكل تنظيمي بسيط — أدوار واضحة، اجتماعات منتظمة، وطريقة لاختيار المشاكل وترتيبها — بخلي الجيران يقدروا يتحركوا ويحلوا مشاكلهم بدون ما يستنوا البلدية أو جمعية أو أي حدا من برا.
كيف بنشتغل؟
بنجمع مجموعة صغيرة من الحارة، كل واحد بياخد دور، بنجتمع بشكل منتظم، بنختار مشكلة وحدة وبنركز عليها، وبنوثق كل اشي — الاجتماعات، القرارات، النتائج، والأخطاء.
الحالة الحالية
الدورة الأولى انتهت. الدورة التانية قيد التحضير.